مدبولي عن زيادة الحد الأدنى للأجور: "يا رب نبقى أكثر من 15 ألف"

لقاء الدكتور مصطفى مدبولي عددًا من طلاب الجامعات

أكد مصطفى مدبولي، رئيس مجلس الوزراء، أن عنصر الدخل هو السبب الأهم وراء رغبة بعض العاملين في التمريض في السفر إلى الخارج، موضحًا أن فرص العمل في دول أخرى توفر دخولًا أكبر مقارنة بمستويات الأجور في مصر، مشيرًا إلى أن الدولة تعمل على تحسين دخول العاملين، لكن الأمر يحتاج إلى وقت.

جاء ذلك خلال لقاء مدبولي عددًا من طلاب الجامعات، على هامش افتتاح المرحلة الأولى من المستشفى الجامعي لجامعة السويس، ردًا على سؤال إحدى الطالبات: "ليه بتوع تمريض بيحبوا يسافروا برة؟ ليه مافيش الاحتياجات بتاعة برة تبقى هنا في البلد؟".

قال مصطفى مدبولي، ردًا على سؤال الطالبة: "سؤال كويس جدًا، وتاني أنا بقول لحضرتك: بالتأكيد، وخلينا نعترف أن أهم حاجة هو عنصر الدخل.. يعني ليه هم عايزين يطلعوا برة؟ لأن بيجدوا فرص عمل بدخل أكبر، أكبر برة.. وإحنا عارفين هذا الأمر.. عارفين أن إحنا عندنا مشكلة في نقدر نقول إن الدخول بتاعتنا في الدولة المصرية مش بالمستوى اللي ممكن نقارنه بدول أخرى".

وأضاف: "ولكن هل إحنا يعني ساكتين على هذا الأمر؟ لا.. إحنا بنحاول نطور، وبنحاول نحسن مستوى الدخول بصورة كبيرة، وعمالين نشتغل على هذا الأمر كدولة.. مرة أخرى مش هيحصل في يوم وليلة، صدقيني، لكن هياخد وقت لغاية لما نقدر كمصر تبقى على المستوى اللي تقولي إن مستوى الدخل هنا بقى يعني يماثل اللي بيبقى الظروف اللي بيبقى فيها في دول أخرى".

تابع رئيس الوزراء: "هنا عايز أقول لحضرتك يعني التوجيهات اللي قالها الرئيس في المنتدى وأرجو أنكم تتابعوها، أن إحنا نطلع بالحد الأدنى للأجور من 8000 لـ 15000 في خلال السنتين تلاتة الجايين بالتدريج، يعني السنة الجاية هنزود شوية، واللي بعدها، واللي بعدها لغاية لما نوصل في ثالث سنة لـ 15000".

وأوضح مدبولي حجم الأعباء المالية المترتبة على زيادة الأجور، قائلًا: "هأقول لحضرتك: أنت لو تقدري تعرفي الكلام ده عشان نقدر أن إحنا نعمله كدولة، إحنا عندنا في الدولة كام موظف اللي متتعينين في الحكومة؟ حد عارف العدد؟ 4 مليون بخلاف هيئات اقتصادية وجهات تانية برضه تابعة للدولة، لكن أنت تتكلمي زي ما حضرتك بتقولي عن الحكومة نفسها 4 مليون.. طب أنا لما بازود في الـ 4 مليون 7000 جنيه في الشهر اللي هم هيبقوا على مدار الثلاث سنين، نضرب كده اعملوا الحساب وتشوفوا الدولة هتبقى بتحمل قد إيه عشان تعمل هذا الأمر".

استكمل رئيس الوزراء: "وده شيء إحنا يا رب نفسنا كحكومة وكدولة.. والرئيس موجهنا.. يا رب نبقى أكثر من 15000 كمان.. فهو ده اللي إحنا كلنا بنشتغل عليه دلوقتي، كل ما هتبقى عندي فرصة أن أنا أحسن الأجور هنعملها".

وأشار مدبولي إلى وجود مسارات أخرى لتحسين دخول العاملين بالتمريض، من خلال التعاون مع الجامعات والجهات المعنية، قائلًا: "بيبقى في بقى تداخلات أخرى بنعملها بقى مع الجامعات والجهات الأخرى دي اللي هي على قد شطارة الممرضة نقدر نخلق له مسار آخر موازي في صورة حوافز ومكافئات على قد ما بيحصل إنجاز ونجاح ويبقى فيه يعني فرص لأن هو يبقى فيه حاجات أخرى موارد إضافية بنعمل هذا الأمر علشان نحسن أكثر وأكثر من مستوى دخول كل الفئات مش فقط التمريض".